BAADA ya Kocha Abdallah Mohamed ‘Bares’ kufikia makubaliano ya kuachana na KMC, amesema anaamini mbadala wake atakuwa na jambo la kushauri ili kuhakikisha timu hiyo inasalia Ligi Kuu Bara kwa msimu ujao.
Bares alisema siyo jambo jema kuizungumzia KMC kwa sasa baada ya kuondoka, lakini anachoamini bado ina nafasi ya kupambania malengo yake, akitumia kauli ya haijaisha hadi iishe.
“Siyo kitu kizuri kuanza kusema hiki na kile kuhusu KMC, jambo la msingi huduma yangu ilipoishia inatosha, naamini atakayekuja nyuma yangu atafanya kitu kikubwa zaidi,” alisema kocha huyo aliyetua kikosini hapo Desemba 30, 2025.
Aliongeza: “Ligi haijaisha, hivyo huwezi kusema KMC haina nafasi, kauli yangu ni haijaisha hadi iishe, hivyo wachezaji waendelee kupambana bila kukata tamaa, naamini watafanya vitu vikubwa zaidi.”
Alisema kwa uzoefu wake wa kuzifundisha timu mbalimbali za Ligi Kuu, kuna nyakati ngumu ambazo zinapaswa kukaza buti na kuangalia malengo zaidi kuliko kujilinganisha na timu zingine.
“Upepo unaweza ukabadilika wakati wowote, KMC inapitia upepo wa kukosa matokeo ya ushindani lakini timu inacheza vizuri, hivyo ni nyakati tu zinazohitaji mabadiliko,” alisema.
Alisema kwa sasa ameamua kupumzika kabla hajafanya uamuzi wa timu gani anatakiwa kwenda kuifundisha hapo baadaye. “Ni mapema, siwezi kusema naenda wapi, ingawa zipo timu ambazo zimenitafuta lakini najipa muda kidogo kabla ya kujua naibukia wapi,” alisema.
Baresi aliyejiunga na KMC Desemba 30, 2025, akichukua nafasi ya Mbrazil Marcio Maximo aliyeondoka Desemba 6, 2025, amekiongoza kikosi hicho katika mechi nane za Ligi Kuu msimu huu na ameshinda moja, sare moja na kupoteza sita, amedumu kwa takribani siku 94 hadi Aprili 3, 2026.
KMC inayoburuza mkia na pointi nane katika msimamo wa Ligi Kuu Bara, imecheza mechi 17, imeshinda mbili sawa na sare, huku ikipoteza 13, imefunga mabao saba na kuruhusu nyavu zake kutikiswa mara 28.
Baresi aliyewahi kuzifundisha timu mbalimbali zikiwemo za maafande wa JKT Tanzania, Tanzania Prisons na Mashujaa, alijiunga na KMC baada ya kuachana na Zimamoto ya visiwani Zanzibar, huku akiwahi pia kuifundisha Mlandege kutoka visiwani humo.