Global Publishers
April 12, 2026
0 Comments
Rais wa Marekani Donald Trump ametangaza mpango mkali wa kibiashara akisema kuwa nchi zitakazohusika kusambaza silaha kwa Iran zitatozwa ushuru wa asilimia 50 mara moja bila msamaha wowote.
Kauli hiyo imetolewa muda mfupi baada ya makubaliano ya kusitisha mapigano kwa muda kati ya Marekani na Iran, hatua inayoongeza mvutano wa kisiasa na kiuchumi duniani.
Trump amesema kuwa bidhaa zote kutoka nchi zitakazobainika kuiuzia Iran silaha zitatozwa ushuru huo kama njia ya kulinda usalama wa Marekani. Ingawa hakuzitaja moja kwa moja nchi husika, taarifa zinaelekeza zaidi kwa mataifa makubwa kama China na Russia.
Mpango huo unakuja wakati ambapo Marekani inaendelea kushutumu baadhi ya mataifa kwa kusaidia Iran kijeshi, licha ya nchi hizo kukanusha madai hayo.
Hatua hiyo inakuja wakati ambapo mahakama ya juu ya Marekani tayari ilipunguza baadhi ya mamlaka ya Trump ya kutoza ushuru wa haraka chini ya sheria ya International Emergency Economic Powers Act, jambo linaloweka changamoto katika utekelezaji wa sera zake.
Wachambuzi wa masuala ya uchumi wanasema hatua hiyo inaweza kuathiri biashara za kimataifa na kuongeza mvutano kati ya Marekani na washirika wake wakuu wa kiuchumi.
Taarifa zinaeleza kuwa Marekani inaamini kuwa China na Russia zinaweza kuwa miongoni mwa nchi zinazosaidia uwezo wa kijeshi wa Iran, madai ambayo mataifa hayo yamekanusha.
China imesisitiza kuwa inafuata msimamo wa kidiplomasia na haina mpango wa kuchochea migogoro, huku Russia pia ikikanusha kuhusika kwa sasa na usambazaji wa silaha kwa Iran.
