Rais wa Marekani Donald Trump ameanzisha mjadala mkubwa kimataifa baada ya kumkosoa vikali Pope Leo XIV kufuatia msimamo wake dhidi ya vita vinavyoendelea Iran.
Akizungumza Jumapili jioni pamoja na kupitia ujumbe wake kwenye mitandao ya kijamii, Trump alisema Papa huyo ni “mbaya katika sera za mambo ya nje” na kuongeza kuwa yeye “sio shabiki wake.” Pia alimshutumu kwa kuwa na msimamo dhaifu kuhusu masuala ya usalama na silaha za nyuklia.
Trump alisisitiza kuwa hataki kiongozi wa kidini anayetoa kauli zinazoweza kuhisiwa kama kuunga mkono Iran kuwa na silaha za nyuklia, akisema msimamo huo ni hatari kwa dunia.
Chanzo cha Mvutano
Kauli za Trump zimekuja kufuatia ujumbe wa Papa Leo XIV alioutoa mwishoni mwa wiki, ambapo alionya kuhusu hatari ya kile alichokiita udanganyifu wa nguvu kupita kiasi, akirejea hali ya vita vinavyoendelea kati ya Marekani, Israel na Iran.
Ingawa Papa hakumtaja Trump moja kwa moja, wachambuzi wengi wanaona ujumbe wake ulikuwa unalenga viongozi wa Marekani, hasa kutokana na matamshi ya awali ya utawala wa Trump kuhusu matumizi ya nguvu za kijeshi.
Papa Leo XIV pia amekuwa akisisitiza mara kwa mara kuwa Mungu haungi mkono vita, akinukuu maandiko ya Biblia yanayokemea umwagaji damu na matumizi ya nguvu kupita kiasi.
Vita ya Maneno Yaendelea
Katika majibu yake, Trump alimkosoa Papa huyo kwa msimamo wake kuhusu masuala ya kimataifa, akisema hataki kuona kiongozi wa kidini anayetoa kauli zinazoweza kufasiriwa kama kuhalalisha Iran kuwa na silaha za nyuklia.
Aidha, rais huyo alikwenda mbali zaidi kwa kudai kuwa kuchaguliwa kwa Papa huyo ambaye ni raia wa Marekani kulichochewa na sababu za kisiasa, akisema uwepo wake Vatican unahusiana na uwepo wake Ikulu.
Kauli hizo zimezua mjadala mpana, huku baadhi ya wachambuzi wakizitaja kuwa ni nadra kwa kiongozi wa Marekani kumshambulia waziwazi Papa kwa kiwango hicho.
Kanisa Katoliki Lajibu
Viongozi wa Kanisa Katoliki nchini Marekani hawajafurahishwa na kauli hizo. Askofu Mkuu Paul S. Coakley amesema amesikitishwa na matamshi ya Trump, akisisitiza kuwa Papa si mwanasiasa bali ni kiongozi wa kiroho anayehudumia waumini duniani kote.
Amesema Papa anazungumza kwa misingi ya Injili na maadili ya kidini, si kwa maslahi ya kisiasa.
Athari kwa Dunia
Mvutano huu unakuja wakati dunia ikiwa katika hali tete kufuatia mgogoro wa Iran na hatua za kijeshi zinazoendelea. Wachambuzi wanaonya kuwa mgongano huu kati ya siasa na dini unaweza kuongeza mgawanyiko wa kimataifa, hasa miongoni mwa waumini na wafuasi wa kisiasa.
Aidha, hali hiyo inaweza kuathiri namna viongozi wa dini wanavyohusishwa katika masuala ya kimataifa, hasa wakati wa migogoro mikubwa ya kisiasa na kijeshi.
