Wananchi wa Kijiji cha Daluni Kisiwani na vijiji vya jirani, wilayani Mkinga mkoani Tanga, wameanza kunufaika na huduma bora za mawasiliano kufuatia uzinduzi wa mnara wa 4G uliojengwa na Airtel Tanzania, hatua inayochochea mabadiliko ya kijamii na kiuchumi katika eneo hilo la mpakani.
Kwa miaka mingi, kijiji hicho kilikabiliwa na changamoto kubwa ya ukosefu wa mawasiliano ya uhakika, hali iliyokuwa ikiathiri shughuli za kiuchumi pamoja na mahusiano ya kijamii ndani ya familia na jamii kwa ujumla. Upatikanaji wa mtandao wa kasi sasa unaanza kufungua ukurasa mpya wa maendeleo.
Akizungumza wakati wa uzinduzi huo, Afisa Masoko wa Airtel Mkoa wa Tanga, Nassor Laizer, alisema kampuni hiyo inaendelea kupanua huduma zake vijijini ili kuhakikisha hakuna Mtanzania anayeachwa nyuma katika mapinduzi ya kidijitali.
“Nia yetu ni kufikisha mawasiliano katika maeneo ya vijijini kama Daluni Kisiwani ili wananchi waweze kushiriki kikamilifu katika uchumi wa kidijitali. Mawasiliano si anasa tena, ni hitaji muhimu kwa maendeleo,” alisema Laizer.
Kauli hiyo inaakisi mwelekeo mpana wa sekta ya mawasiliano nchini, ambapo kampuni nyingi sasa zinaelekeza uwekezaji wao katika maeneo ambayo hapo awali hayakuwa na huduma za kutosha.
Kwa wakazi wa eneo hilo, manufaa ya mnara huo yanaonekana moja kwa moja katika maisha ya kila siku. Wakazi Kassim Kumba na Fatuma Hozza walisema changamoto ya mtandao ilikuwa ikisababisha hata migogoro ndani ya familia kutokana na kushindwa kuwasiliana kwa wakati.
“Kulikuwa na wakati huwezi kumpata ndugu yako kwa siku kadhaa. Hali hii ilisababisha kutoelewana na wakati mwingine migogoro ndani ya familia,” alisema Kumba.
“Sasa tunaweza kuwasiliana kwa urahisi. Inaleta utulivu na kuimarisha mahusiano,” aliongeza Hozza.
Maelezo yao yanaonyesha athari za moja kwa moja za ukosefu wa mawasiliano, si tu katika uchumi bali pia katika mshikamano wa kijamii.
Akizungumza kwa niaba ya Mbunge wa Mkinga, Kiroboto S. Kiroboto aliwataka wananchi kutumia fursa ya huduma hiyo mpya kwa maendeleo yao.
“Huu ni wakati sahihi kwa wananchi kutumia mtandao huu kwa shughuli za kiuchumi na kijamii, ikiwemo kutafuta masoko na fursa mbalimbali za kidijitali ambazo awali hazikuwepo,” alisema.
Uwekezaji wa miundombinu ya mawasiliano una mchango mkubwa katika kuchochea uchumi wa vijijini. Upatikanaji wa mtandao unawezesha huduma za kifedha za simu, biashara mtandaoni, elimu ya kidijitali na hata huduma za serikali kwa njia ya mtandao.
Uzinduzi wa mnara huo pia unaendana na juhudi za Serikali chini ya Rais Samia Suluhu Hassan za kupunguza pengo la kidijitali kati ya mijini na vijijini, kupitia ushirikiano na sekta binafsi pamoja na miradi ya Mfuko wa Mawasiliano kwa Wote (UCSAF).
Kwa sasa, Daluni Kisiwani inaanza kushuhudia mabadiliko chanya, ambapo mawasiliano rahisi yanakuwa chachu ya maendeleo ya kiuchumi na kijamii, na kuunganisha jamii ambayo kwa muda mrefu ilikuwa nyuma kimaendeleo.
