Global Publishers
April 16, 2026
0 Comments
Rais wa Jamhuri ya Muungano wa Tanzania, Samia Suluhu Hassan, leo Aprili 16, 2026 amefungua rasmi Mkutano wa Pili wa Kimataifa wa Shirikisho la Dunia la Madaktari Bingwa wa Upasuaji wa Ubongo na Mishipa ya Fahamu (WFNS) katika Kituo cha Mikutano cha Kimataifa cha Julius Nyerere (JNICC) jijini Dar es Salaam
Katika hotuba yake ya ufunguzi, Rais Samia alieleza umuhimu wa mkutano huo kwa maendeleo ya sekta ya afya nchini na duniani kwa ujumla, hasa katika kuboresha huduma za tiba za ubongo na mishipa ya fahamu ambazo ni nyeti na zinahitaji utaalamu wa hali ya juu.
Amesema Tanzania inaendelea kuwekeza katika miundombinu ya afya, mafunzo kwa wataalamu, pamoja na teknolojia za kisasa ili kuhakikisha wagonjwa wanapata huduma bora ndani ya nchi bila kulazimika kwenda nje ya nchi kutafuta matibabu.
Rais Samia pia alisisitiza umuhimu wa ushirikiano wa kimataifa kati ya madaktari bingwa, watafiti, na taasisi za afya ili kubadilishana ujuzi na kuongeza ubora wa huduma za upasuaji wa ubongo na mfumo wa neva.
Aidha, aliupongeza Shirikisho la Dunia la Madaktari Bingwa kwa kuichagua Tanzania kuwa mwenyeji wa mkutano huo muhimu, akisema ni fursa ya kuimarisha hadhi ya nchi kama kitovu cha mikutano ya kisayansi na kiafya barani Afrika.
Mkutano huo umehusisha wataalamu kutoka nchi mbalimbali duniani, ukilenga kujadili maendeleo ya tiba, utafiti, na teknolojia mpya katika upasuaji wa ubongo na mishipa ya fahamu.
Serikali imesema itaendelea kushirikiana na wadau wa sekta ya afya kuhakikisha huduma bora zinapatikana na kupunguza changamoto zinazowakabili wagonjwa wa magonjwa ya neva nchini.
