Papa Leo XIV ameanza rasmi safari yake ya kitume barani Afrika kwa kutembelea Msikiti Mkuu wa Algiers, ambapo alisisitiza umuhimu wa kiroho wa eneo hilo na kusimama kimya kwa tafakari.
Akipokelewa na Mkuu wa Msikiti huo, Mohamed Mamoun al Qasim, aliyetoa maneno ya undugu, Papa alisema: “Ninakushukuru kwa tafakari hizi na kwa maneno haya muhimu wakati wa ziara hii, kutoka mahali panapowakilisha nafasi ya Mungu, nafasi ya kimungu na takatifu, ambapo watu wengi huja kusali na kutafuta uwepo wa Aliye Juu katika maisha yao.”
Aliendelea kukumbusha uhusiano wake binafsi na nchi hiyo kupitia Augustine wa Hippo, akiielezea Algeria kama “nchi ya baba yangu wa kiroho,” na kusisitiza mada kuu za hotuba yake: utafutaji wa ukweli, kutambua hadhi ya kila binadamu, na wajibu wa pamoja wa kujenga amani. “Kumtafuta Mungu,” alisema, “pia kunamaanisha kutambua sura ya Mungu ndani ya kila mwanaume na mwanamke,” akiongeza kuwa utambuzi huo unahitaji heshima ya pande zote na kuishi kwa amani pamoja.
Papa pia aligusia dhima ya kidini na kielimu ya msikiti huo, akisisitiza umuhimu wa kuendeleza maarifa ya binadamu ili kuelewa vyema uumbaji na hadhi ya mwanadamu.
Alimalizia kwa kuahidi kuliombea taifa la Algeria na mataifa yote, akieleza matumaini kwamba amani, haki, maridhiano na msamaha vitaendelea kukua miongoni mwa watu.
Katika ziara hiyo, Papa aliambatana na Makardinali George Jacob Koovakad, Mkuu wa Idara ya Majadiliano ya Kidini, na Jean-Paul Vesco, Askofu Mkuu wa Algiers. Ratiba ya ziara ilijumuisha matembezi ya kuongozwa ndani ya msikiti, kupiga picha rasmi, na kutia saini katika Kitabu cha Wageni Mashuhuri, ambapo Papa aliandika:
“Rehema za Aliye Juu ziwalinde watu wa heshima wa Algeria na familia nzima ya binadamu katika amani na uhuru.”
