Dar es Salaam. Soko la mitaji nchini limepata msukumo mpya baada ya hatifungani ya kampuni ya Equity for Tanzania Limited (EFTA) kuvuka lengo kwa asilimia 220.24.
Hali hiyo inatafsiriwa kama kuongezeka kwa imani ya wawekezaji katika sekta ya uzalishaji.
Hatifungani hiyo, iliyofunguliwa Februari 10, 2026 na kufungwa Machi 16, 2026, ilivutia ushiriki mpana kutoka kwa wawekezaji wadogo na wakubwa, hali inayoashiria ongezeko la hamu katika zana za uwekezaji zenye kipato kisichobadilika katika soko la mitaji la ndani.
Kutokana na uhitaji mkubwa uliozidi matarajio, EFTA ilipata kibali cha mamlaka husika kukubali kiasi chote kilichochangiwa na kugawa mgao kwa wawekezaji wote wenye maombi halali kwa asilimia 100.
Hatifungani hiyo ya miaka mitano ina riba ya asilimia 14 kwa mwaka, inayolipwa mara mbili kwa mwaka, ikiifanya kuwa miongoni mwa zana za kati zenye mvuto katika soko la deni la kampuni.
Akizungumzia matokeo hayo, Mtendaji Mkuu wa EFTA, Nicomed Bohay, amesema mafanikio hayo yanaonesha imani kubwa ya wawekezaji katika taasisi hiyo na mkakati wake wa uwekezaji.
“Matokeo haya yanaonesha wazi imani ya wawekezaji katika mkakati wetu wa kuwekeza katika uchumi halisi. Tutaendelea kuelekeza rasilimali hizi katika sekta zenye tija ili kuchochea ukuaji wa biashara, ajira na maendeleo ya kiuchumi kwa ujumla,” amesema.
Kwa mujibu wa ratiba ya toleo hilo, hatifungani hiyo ilitolewa Aprili 13, 2026 na inatarajiwa kukomaa Aprili 12, 2031, huku malipo ya riba yakipangwa kufanyika Aprili 12 na Oktoba 12 kila mwaka.
Hatifungani hiyo pia inatarajiwa kuorodheshwa katika Soko la Hisa la Dar es Salaam (DSE) Aprili 22, 2026.
Ufanisi huo unaonesha kuongezeka kwa hamu ya wawekezaji katika zana za soko la mitaji zinazosaidia sekta za uzalishaji, hali inayosisitiza nafasi inayokua ya soko hilo katika kufadhili ukuaji wa uchumi nchini.
Wachambuzi wa soko wanaona mafanikio hayo kama ishara ya uwezekano wa kupanuka kwa matumizi ya hatifungani kama chombo cha kufadhili shughuli za uzalishaji nchini.
Pia yanaweza kuhamasisha kampuni nyingine kuingia sokoni kukusanya mitaji kwa njia mbadala badala ya kutegemea mikopo ya benki pekee.
Aidha, mwitikio huo unaweza kuongeza kasi ya ubunifu wa bidhaa za kifedha zinazolenga kuunganisha wawekezaji na fursa za moja kwa moja katika uchumi halisi.
Pamoja na mafanikio hayo, wataalamu wanaonya umuhimu wa usimamizi makini wa fedha zilizokusanywa ili kuhakikisha zinatumika kwa ufanisi na kurejeshwa kwa wakati. Ukuaji wa haraka wa mikopo unahitaji mifumo imara ya tathmini ya hatari na ufuatiliaji wa miradi inayofadhiliwa.
